پاکستان نے دی بھارت کو کراری شکست

سینچورین : چیمپئنزٹرافی کے اہم میچ میں پاکستان نے بھارت کوچون رنز سے ہرا دیا۔سپر اسپورٹس پارک سینچورین میں بھارت نے ٹاس جیت کر پاکستان کو بیٹنگ کرنے کی دعوت دی۔ گرین شرٹس کا آغاز متاثر کن نہ ہوا۔ عمران نذیر بیس، کامران اکمل انیس جبکہ کپتان یونس خان بیس رنز بناکر پویلین واپس لوٹ گئے ۔ اس موقع پر رنزوں کی مشین محمد یوسف اورشعیب ملک نے بھرپور ذمہ داری کامظاہرہ کیا اور بھارتی باؤلروں کو آڑے ہاتھوں لیا۔دونوں بیٹسمینوں کی دلکش بیٹنگ کے سامنے بھارت باؤلرز بے بس دکھائی دیئے۔ محمدیوسف اور شعیب ملک نے تیسری وکٹ کی شراکت میں دو سو چھ رنزکااضافہ کیا۔محمدیوسف ستاسی رنز بناکر آؤٹ ہوئے۔ شاہد آفریدی چار جبکہ عمر اکمل بغیر کوئی رن بنائے پویلین لوٹے۔شعیب ملک سولہ چوکوں کی مدد سے ایک سو اٹھائیس رنزبناکر آؤٹ ہوئے۔عمرگل اور محمد عامر کھاتہ کھولے کھولے بغیر آؤٹ ہوگئے۔یوں پاکستان نے مقررہ پچاس اوورز میں نو وکٹوں پر تین سو دو رنز کا مجموعہ ترتیب دیا۔ نوید الحسن گیارہ رنز بناکر ناقابل شکست رہے۔ اشیش نہرا نے چارجبکہ ایشانت شرما نے دو کھلاڑیوں کو آؤٹ کیا۔ جواب میں بھارت کو اننگز کے آغاز میں ہی لٹل ماسٹر سچن ٹنڈولکر کی وکٹ کا نقصان اٹھاناپڑا جوآٹھ رنز کی اننگز کھیل کر محمد عامر اور کامران اکمل کے گٹھ جوڑ کا شکار بنے۔ اس موقع پر گوتم گھمبیر نے جارحانہ انداز اختیار کیااوراپنی دھواں دار بیٹنگ سے نصف سنچری مکمل کی۔ بھارت کو نوے رنز کے ٹوٹل پر دوسری وکٹ کا نقصان اٹھاناپڑا۔ گھمبیرستاون رنز بناکر یونس خان کی تھروپر رن آؤٹ ہوبیٹھے۔ شاہد خان آفریدی نے سولہ رنز بنانے والے ورات کوہلی کو عمر گل کے ہاتھوں چلتا کردیا۔ آفریدی نے تین رنز بنانے والے بھارتی کپتان مہندرسنگھ دھونی کوایل بی ڈبلیوکرکے بھارت کے لئے مزید پریشانیاں کھڑی کردیں۔بھارتی کپتان کے آوٹ ہونے کے بعد سریش کمار رئینا اور راہول ڈریوڈ نے ذمہ دارانہ اننگز کھیل کرٹیم اپنی کا اسکور دو سو پانچ رنز تک پہنچا دیا۔سریش کمار رائینا کو پاکستانی اسپینر سعید اجمل نے ایل بی ڈبلیو آوٹ کردیا،رائینا نے چھیالیس رنز بنائے۔رائینا کے آوٹ ہونے کے بعد بھارتی ٹیم وکٹ سنبھال نہیں پائی اور یوسف پٹھان پانچ رنز بناکر محمد عامر کی باولنگ پر مصباح الحق کے ہاتھوں کیچ آوٹ ہوگئے۔چھیتر رنزپرراہول ڈریوڈ کے آوٹ ہونے پر بھارتی ٹیم شدید دباؤ کا شکار ہوگئی ڈریوڈ کو عمر گل کے تھرو پر کامران اکمل نے رن آوٹ کیا۔آر پی سنگھ ٹیم کو نقصان سے بچانے میں ناکام رہے اور رانا نوید کی باولنگ پر محمد یوسف نے آر پی سنگھ کا کیچ لیا۔رانا نوید نے جاندار باولنگ سے نئے آنے والے کھلاڑی شانت شرما کو بولڈ کردیا شانت شرما کوئی رن نہیں بنا پائے۔کھیل کے آخری حصے میں سعید اجمل نے ہر بجن سنگھ کو بولڈ کرکے پاکستانی ٹیم کی فتح کا اعلان کردیا۔ پاکستانی آل راونڈر شعیب ملک کو مین آف دی میچ قرارپائے۔